Bismillah ir Rahmaan al Raheem Nahmaduhu wa nusalli wa nusallimu ‘ala Rasulihil Kareem Sall Allahu ‘alaihi wa Aalihi wasallam Bayaan ho kis zabaan se martabah Siddiq e Akbar ka, Hai Yaar e ghaar Mahbub e Khuda Siddiq e Akbar ka. (radi Allahu Ta’ala ‘anhu) Yaa Ilaahi raham farmaa Khaadim e Siddiq e Akbar houn, Teri rahmat ke sadqe waasitah Siddiq e Akbar ka. (radi Allahu Ta’ala ‘anhu) Rusul o Ambiyaa ke ba’ad jo afzal hai ‘aalam se, Yeh ‘aalam mein hai kis ka martabah Siddiq e Akbar ka. (radi Allahu Ta’ala ‘anhu) Gadaa Siddiq e Akbar ka khudaa se fazl paataa hai Khudaa ke fazl se houn main gadaa Siddiq e Akbar ka. (radi Allahu Ta’ala ‘anhu) Nabi ka aur khudaa ka madh go Siddiq e Akbar hai, Nabi Siddiq e Akbar ka Khudaa Siddiq e Akbar ka. (radi Allahu Ta’ala ‘anhu) Zia mein mehr ‘aalamtaab ka yun naam kab hota, Nah hota naam gar wajh e zia Siddiq e Akbar ka. (radi Allahu Ta’ala ‘anhu) Zae’efi mein yeh quwwat hai zae’efoun ko qawe kar dein, Saharaa lein zae’ef o aqwiyaa Siddiq e Akbar ka. (radi Allahu Ta’ala ‘anhu) Khudaa ikraam farmaataa hai atqaa keh kar Quran mein, Karein phir kyun nah ikraam atqiyaa Siddiq e Akbar ka. (radi Allahu Ta’ala ‘anhu) Safaa wuh kuch mili khaak sar koo e payambar se, Musaffaa aainah hai naqsh e paa Siddiq e akbar ka. (radi Allahu Ta’ala ‘anhu) Hue Faruq o Usmaan o ‘Ali jab daakhil e bay’at, Banaa fakhr e salaasil silsilah Siddiq e Akbar ka. (radi Allahu Ta’ala ‘anhum) Maqaam e khawaab e raahat chain se aaraam karne ko, Banaa pehlu e Mehbub e Khudaa Siddiq e Akbar ka. (radi Allahu Ta’ala ‘anhu) ‘Ali hain us ke dushman aur wuh dushman ‘Ali ka hai, Jo dushman ‘aql ka dushman hua Siddiq e Akbar ka. (radi Allahu Ta’ala ‘anhumaa) Lutaayaa raah e Haq main ghar kaie baar is mahabbat se, Keh lut lut kar Hasan ghar ban gayaa Siddiq e Akbar ka. (radi Allahu Ta’ala ‘anhumaa) Ustaaz al Zaman Imaam Hasan Raza Khan Noori Hasan 'alaihi al rahmah wa al ridwaan Zawq e Na'at