Ghalib's greatest ghazal?

Discussion in 'Poetry' started by naqshbandijamaati, Mar 9, 2008.

Draft saved Draft deleted
  1. muddat huʾī hai yār ko mihmāñ kiye huʾe
    josh-e qadaḥ se bazm chirāġhāñ kiye huʾe




    kartā hūñ jamʿa phir jigar-e laḳht-laḳht ko
    ʿarṣah huʾā hai daʿvat-e mizhgāñ kiye huʾe





    phir vaẓʿ-e iḥtiyāt̤ se rukne lagā hai dam
    barsoñ huʾe haiñ chāk-e garebāñ kiye huʾe





    phir garm-e nālah'hā-e sharar-bār hai nafas
    muddat huʾī hai sair-e chirāġhāñ kiye huʾe





    phir pursish-e jarāḥat-e dil ko chalā hai ʿishq
    sāmān-e ṣad-hazār namakdāñ kiye huʾe





    phir bhar rahā hūñ ḳhāmah-e mizhgāñ bah ḳhūn-e dil
    sāz-e chaman-t̤arāzī-e dāmāñ kiye huʾe





    bā-ham-digar huʾe haiñ dil-o-dīdah phir raqīb
    naz̤z̤ārah-e jamāl kā sāmāñ kiye huʾe





    dil phir t̤avāf-e kū-e malāmat ko jāʾe hai
    pindār kā ṣanam-kadah vīrāñ kiye huʾe





    phir shauq kar rahā hai ḳharīdār kī t̤alab
    ʿarẓ-e mataʿ-e ʿaql-o-dil-o-jāñ kiye huʾe





    dauṛe hai phir har ek gul-o-lālah par ḳhiyāl
    ṣad gulsitāñ nigāh kā sāmāñ kiye huʾe





    phir chāhtā hūñ nāmah-e dildār kholnā
    jāñ nażr-e dil-farebī-e ʿunvāñ kiye huʾe





    māñge hai phir kisī ko lab-e bām par havas
    zulf-e siyāh ruḳh pah pareshāñ kiye huʾe





    chāhe hai phir kisī ko muqābil meñ ārzū
    surme se tez dashnah-e mizhgāñ kiye huʾe





    ik nau-bahār-e nāz ko tāke hai phir nigāh
    chahrah furoġh-e mai se gulistāñ kiye huʾe





    phir jī meñ hai kih dar pah kisī ke paṛe raheñ
    sar zer-bār-e minnat-e darbāñ kiye huʾe





    jī ḍhūñḍtā hai phir vuhī furṣat kih rāt din
    baiṭhe raheñ taṣavvur-e jānāñ kiye huʾe





    ġhālib hameñ nah chheṛ kih phir josh-e ashk se
    baiṭhe haiñ ham tahīyah-e t̤ūfāñ kiye huʾe
     

Share This Page